Ky emërim, vërteton faktin se policia nuk po pastrohet, por kupola e saj drejtuese, po blindohet me oficerë të lidhur me krimin e organizuar…
Drejtori i Përgjithshëm i Policisë së Shtetit, Ilir Proda, është përfshirë në një tjetër skandal të rëndë, këtë herë për emërimin në post të lartë drejtues të një oficeri të ndëshkuar dhe me dosje të hapur penale për favorizim të trafikantëve të drogës. Në kundërshtim flagrant me ligjin për Policinë e Shtetit dhe me çdo standard të sigurisë, Ilir Proda ka emëruar Drejtor Policie të Qarkut Korçë, mikun e tij të afërt Ulian Shpataraku, i njohur në Elbasan si “njëshi” i lidhjeve me botën e krimit.
Më 31 janar 2023, kur mbante postin e Shefit të Sektorit për Hetimin e Narkotikëve dhe Trafiqeve në Drejtorinë e Policisë-Elbasan, Ulian Shpataraku u pezullua nga detyra dhe u procedua penalisht për lirim të një trafikanti droge në kërkim, shtetasin Endrit Filja.
Sipas dosjes, më 14 shtator 2022, Shpataraku shoqëroi në ambientet e policisë të shumëkërkuarin për trafik droge, por në vend që ta arrestonte sipas urdhrit të prokurorisë, ai e la të lirë. Fshehu shoqërimin, nuk e regjistroi në sistem dhe nuk informoi organin procedues.
Agjencia e Mbikëqyrjes Policore dhe Prokuroria e Elbasanit kërkuan pezullimin e tij, kërkesë që u mbështet edhe nga Gjykata e Shkallës së Parë. Më vonë, Gjykata e Apelit në Durrës e riktheu në detyrë, por Kolegji Penal i Gjykatës së Lartë e rrëzoi këtë vendim dhe e la në fuqi pezullimin dhe hetimin penal.
Në atë kohë, shef i drejtpërdrejtë i Ulian Shpatarakut ishte vetë Ilir Proda, Zv/drejtor për Hetimin e Krimeve në Elbasan. Sipas informacioneve operative, Proda ka qenë i përfshirë në fshehjen e ngjarjes dhe në koordinimin e lirimit të trafikantit.
Pavarësisht kësaj, në dhjetor 2023, me propozim të Ilir Prodës tashmë në detyrën e Drejtorit të Policisë-Elbasan, drejtori i atëhershëm Muhamet Rrumbullaku e shpërbleu Ulian Shpatarakun me një certifikatë “Për shërbime të shquara në luftën kundër krimit”.
Më 3 tetor 2024, sapo u ngjit në postin e Drejtorit të Përgjithshëm të Policisë së Shtetit, Ilir Proda e komandoi Ulian Shpatarakun si drejtues të Policisë në Elbasan, edhe pse ai ishte ende nën procedim penal, pa gradë dhe pa certifikatë sigurie.
Në 13 shkurt 2025, Proda e tërhoqi Shpatarakun në Drejtorinë e Përgjithshme, duke e emëruar si kryespecialist për çështjet e antidrogës në kabinetin e tij.
Por kulmi arriti më 12 korrik 2025, kur Ilir Proda e emëroi mikun e tij në postin e Drejtorit të Policisë së Qarkut Korçë, një pozicion i lartë ku kërkohen standarde të larta sigurie dhe integriteti, ndërkohë që Shpataraku është subjekt aktiv i një çështjeje penale për shpërdorim detyre dhe lirim të një trafikanti droge.
Ky emërim skandaloz konfirmon se kupola e policisë jo vetëm që nuk po pastrohet nga lidhjet me krimin, por po forcohet me individë që kanë bashkëpunuar drejtpërdrejt me grupet kriminale.
Për të shmangur përgjegjësinë dhe për ta mbuluar me legalitet këtë vendim të paligjshëm, Ilir Proda deklaroi publikisht se emërimi i Ulian Shpatarakut u bë përmes një “konkursi”, ndonëse ky i fundit nuk plotëson as kriteret minimale për të punuar si pastrues në polici.
Leave a Reply