Skandali i prokurores Felaj: Transferimi dhe përjashtimi nga drejtësia pas hetimeve për pasuri të paligjshme dhe kontakte me krimin…
Gjatë periudhës 2010–2023 në Vlorë dhe më pas nga viti 2023 në Prokurorinë e Tiranës, prokurorja Eranda Felaj është denoncuar disa herë për favore ndaj eksponentëve të krimit dhe zyrtarëve të korruptuar, kundrejt shpërblimeve financiare. Sipas burimeve, në disa raste ajo ka përdorur bashkëshortin e saj, avokat me ndikim në qarqe gjyqësore si ndërmjetës në këto marrëveshje.
Megjithatë, për asnjë nga këto denoncime nuk është marrë ndonjë masë disiplinore, as janë hapur hetime penale. Kjo për faktin se Eranda Felaj ka qenë nën mbrojtjen dhe ndikimin e motrës së saj, Ermonela Felaj, e cila ka mbajtur poste të larta politike si deputete, ministre, nënkryetare e Kuvendit dhe drejtuese e Komisionit Parlamentar të Ligjeve.
Përmes kësaj mbështetjeje politike dhe marrëdhënieve të privilegjuara me drejtues të lartë të Këshillit të Lartë të Prokurorisë, më 27 qershor 2023 Eranda Felaj u transferua nga Vlora në Prokurorinë e Tiranës. Aty iu bashkua të afërmve të saj: vëllait Armando Felaj, bashkëshortes së tij Alma Felaj dhe kunatit Bledar Valikaj, të gjithë të emëruar prokurorë në rrethana të debatueshme.
Më 8 nëntor 2024, Felaj kaloi fazën e parë të vettingut, pavarësisht dyshimeve të shumta për pasuri të pajustifikuara dhe për lidhje me eksponentë të krimit të organizuar, gjatë 19 viteve të karrierës në sistemin e drejtësisë.
Por më 29 korrik 2025, me vendim përfundimtar të Komisionit të Posaçëm të Apelimit (KPA), ajo u shkarkua dhe u përjashtua nga sistemi i drejtësisë për një periudhë 15-vjeçare. Sipas vendimit, Felaj kishte kryer shkelje të rënda etike dhe ligjore, kishte përfituar pasuri në mënyrë të paligjshme dhe kishte pasur kontakte të papërshtatshme me persona të dënuar apo të hetuar për krim të organizuar.
Vendimi i KPA-së është i formës së prerë dhe mbështetet në një raport të plotë të analizës financiare dhe integritetit profesional. Kujtojmë se aktualisht KPA është një strukturë e brendshme në varësi të SPAK-ut dhe funksionon nën drejtimin e kreut të Prokurorisë së Posaçme, Altin Dumani, deri në përfundim të procesit të vettingut në qershor 2026.
Çështja e prokurores Eranda Felaj është tani de facto në duart e SPAK. Të gjitha provat dhe gjetjet janë dokumentuar nga një komision brenda vetë strukturave të posaçme të drejtësisë. Në këtë kontekst, lind pyetja legjitime: a do të urdhërojë SPAK fillimin e procedurës penale ndaj saj?
Në raportin e vettingut është evidentuar gjithashtu edhe një detaj tepër shqetësues: Autoriteti Kombëtar për Sigurinë e Informacionit të Klasifikuar (AKSIK), përmes një shkresë zyrtare të datës 27 maj 2024, kishte dhënë për prokuroren Felaj një certifikatë sigurie të nivelit të lartë, ndonëse ishin të njohura lidhjet e saj me botën e krimit. Kjo e lejoi atë të vijonte detyrën, edhe pse duhej të ishte përjashtuar më herët.
Nëse SPAK aplikon me përpikmëri të njëjtat standarde për zyrtarët e tjerë të drejtësisë, çështja penale ndaj Eranda Felajt nuk ka nevojë për kallëzim shtesë, dosja ekziston, provat janë të mjaftueshme dhe rasti është tashmë i certifikuar nga vetë struktura që e përjashtoi./
Leave a Reply