Kreu i Nismës Thurje Endri Shabani ka reaguar pas vendimit të KQZ për t’i dhënë mandatin e deputetes Kleana Xhuvelit dhe duke i dhënë fund sherrit që ka nisur mes tij dhe Adriatik Lapajt.
Shabani shprehet se ishte bashkëshortja e tij që refuzoi mandatin dhe ai kaloi te Xhuveli, duke dëshmur se ai nuk e donte atë mandat, teksa shton se pa votat e tij edhe motra e Lapajt nuk do bëhej dot deputete.
Ai shprehet se “nuk do të djegin jorganin për një plesht”, teksa fton Lapajn që dhe ai të nxjerr mësimet e veta nga gjithë kjo.
Postimi i plotë
U mbars mali dhe…Njëmijë akuza.
Ndërkohë sot, njeriu im më i afërt dha dorëheqjen dhe mandatin e mori Kleana Xhuveli. Kleana nuk është daja im po motra e Adriatik Lapajt!
Deri dje na akuzonte do bëheshim vota e 84 e Ramës.
Sot që mori mandatin për motrën, Adriatiku na thotë që i qenka lutur Rama për bashkëqeverisje.
Medemek Rama që mezi e përzuri LSI-në kur kishte 74, po i lutet Adriatikut fiks tani që ka 83 dhe ka gllabëruar çdo pushtet!
Me sa duket, tullumbaci i 71 mandateve që Adriatiku përbetohej se do merrte, ende nuk qenka shfryrë në kokën e tij nga gjilpëra e realitetit të 11 majit, ku pa votat tona do kishte mbetur edhe e motra pa mandat.
Nejse, kjo ishte kostoja krejt e panevojshme që ne të Nismës morëm për ndershmërinë dhe seriozitetin tonë në koalicion me një politikan të ri që më mirë se sa ne, njeh të gjitha metodat e vjetra.
Megjithatë ne nuk e djegim jorganin për një plesht, kur për më tepër kemi njohur dhe vlerësojmë plot djem e vajza në radhët e Shqipëria Bëhet.
Ndërsa Adriatikut ia kam falur se nuk diti se ç’bëri dhe uroj të nxjerrë edhe ai mësimet e veta siç kam nxjerrë unë të miat.
Leave a Reply