Ja kabllogrami i plotë i Rubios dhe efektet në Tiranë…
Sali Berisha dhe Edi Rama duket se nuk do ta kenë aspak të lehtë me administratën Trump. Edhe pse të dy po përdorin të gjitha manovrat duke e joshur sa më shumë, sinjalet janë se nuk ka më “qofte ke daja”.
Kryeministri Edi Rama ka arritur të joshë shumë ambasadorë të SHBA vitet e fundit, por tani “Rruga e Elbasanit” duket se do të marrë një pozicion krejt të ri dhe sinjalet u dhanë sot.
Një kabllogram i klasifikuar i Sekretarit amerikan të Shtetit, Marco Rubio, ka kërkuar nga ambasadat e SHBA që të mos komentojnë më mbi legjitimitetin e zgjedhjeve në vendet ku operojnë. Dhe në Tiranë, kjo politikë e re është ndjerë më shumë se kudo tjetër.
Shqipëria sapo mbajti zgjedhjet e përgjithshme dhe ambasada amerikane ka vendosur e para këtë praktikë. Ajo nuk uroi Ramën, nuk foli mbi legjitimitetin e zgjedhjeve, por uroi shqiptarët. Pra praktikisht, injoroi gjithë klasën politike.
Rama, që dikur pozonte krah Hillary Clinton apo Barak Obamës sot ndodhet në një boshllëk të frikshëm diplomatik lidhur me SHBA. Nuk ka pasur asnjë takim zyrtar në Uashington që prej ardhjes së Trump në pushtet. Sado ka punuar nën rrogoz, duket se nuk ia ka dalë. Vizita e fundit në SHBA ishte në dasmën e Alex Soros, një dëshmi e qartë se Rama përplaset te demokratët kur nuk e presin republikanët. Pra duket qartë se si ambasada ashtu dhe DASH nuk do lejojë që të përdoren për interesa të brendshme. Rama në shumë raste ka përdoru mbështetjen e SHBA për të përfituar politikisht në Tiranë.
Por ky kabllogram duket se i ka “prerë krahët” edhe Berishës. Ky i fundit ka lidhur një kontratë lobimi 6 mln dollarë dhe lufta e madhe që po bën pas 11 majit, është të bindë amerikanët të rrëzojnë zgjedhjet. Kompania e lobimit po dërgon fakte e dokumente në DASH, por duket se e gjitha do të jetë e kotë. SHBA nuk flet më për zgjedhjet dhe Berisha ka marrë një goditje të madhe. Për të mos përmendur “non gratën” e cila është ende në fuqi pavarësisht parave që po hidhen.
Pra, në lojën e re të Uashingtonit, SHBA nuk do të jetë më si dikur. Kjo nga njëra anë i jep dorë të lirë qeverisë të ‘livadhisë’ dhe nga ana tjetër i ‘lidh duart’ opozitës. Por mesahzi është i qartë: ‘Gomarin nga balta duhet ta nxjerrin shqiptarët’. Nuk duhet pritur më te SHBA.
Kabllogrami i Sekretarit Rubio
-Mesazhe publike mbi zgjedhjet në kuadër të politikës së jashtme “Amerika e Para”
Ky mesazh përmban udhëzime të reja për zyrat brenda vendit dhe për ambasadat jashtë vendit lidhur me mesazhet publike mbi zgjedhjet në vende të huaja.
Në përputhje me theksin e administratës mbi sovranitetin kombëtar, Departamenti do të komentojë publikisht mbi zgjedhjet vetëm nëse ekziston një interes i qartë dhe i rëndësishëm për politikën e jashtme amerikane. Kur është e përshtatshme të komentojmë mbi zgjedhje në një vend të huaj, mesazhi ynë duhet të jetë i shkurtër, i përqendruar në urimin për kandidatin fitues dhe, kur është e përshtatshme, në përmendjen e interesave të përbashkëta të politikës së jashtme. Mesazhet duhet të shmangin komentimin mbi ndershmërinë apo integritetin e procesit zgjedhor, legjitimitetin e tij apo vlerat demokratike të vendit në fjalë.
Presidenti Trump e ka shprehur qartë vizionin e tij për një politikë të jashtme “America First” në fjalimin e tij në Riad më 13 maj. Presidenti vlerësoi progresin që vjen nga “vende sovrane që ndjekin vizionin e tyre unik dhe caktojnë fatin e tyre në mënyrën e tyre.” Ndërsa SHBA do të qëndrojë besnike ndaj vlerave të saj demokratike dhe do t’i festojë këto vlera kur vende të tjera zgjedhin një rrugë të ngjashme, Presidenti bëri të qartë se SHBA do të ndjekë partneritete me cilindo vend ku përputhen interesat tona strategjike.
-Udhëzime për Mesazhet mbi Zgjedhjet nga Washingtoni
Departamenti nuk do të lëshojë deklarata apo postime në rrjete sociale lidhur me zgjedhje përveç rasteve kur ka një interes të qartë për politikën e jashtme. Nëse një ambasadë apo një byro rajonale mendon se ekziston një arsye e tillë, duhet të kërkojë më parë udhëzime nga zyrat D, P, C dhe S/P përpara se të përgatisë ndonjë deklaratë.
Mesazhet mbi zgjedhje nga Ëashingtoni duhet të publikohen vetëm nga Sekretari (S) ose zëdhënësi (SPOX). Askush tjetër nuk duhet të bëjë deklarata publike mbi zgjedhjet pa autorizim të qartë nga D, P, C dhe S/P.
-Udhëzime për Ambasadat jashtë vendit
Ambasadat jashtë vendit mund të postojnë vetë urime për fituesit në faqet zyrtare ose në mediat sociale, nëse rezultati i zgjedhjeve nuk është i kontestuar publikisht. Mesazhet duhet të fokusohen te rezultati, jo te procesi. Në raste të paqarta, të konsultohen me zyrën e shtypit të byrosë përkatëse rajonale.
Ambasadat mund të shpërndajnë mesazhe të ardhura nga llogaritë zyrtare të Shtëpisë së Bardhë ose nga llogaritë kryesore të Departamentit të Shtetit (S, D, SPOX, StateDept). Nëse duan të shpërndajnë mesazhe të tjera (nga Kongresi, organizata ndërkombëtare, vëzhgues të zgjedhjeve, etj.), duhet të marrin miratimin e zyrës së shtypit të byrosë rajonale, e cila duhet të konsultohet me D, P, C dhe S/P.
Denoncimi i Zgjedhjeve
(SBU) Nëse një ambasadë apo një byro dëshiron të lëshojë një deklaratë që denoncon procesin apo rezultatin e një zgjedhjeje (p.sh. dhunë gjatë votimit ose zgjedhje farsë), duhet të kërkojë miratimin e D, P, C dhe S/P. Këto raste do të jenë të rralla.
Çfarë duhet dhe nuk duhet bërë
Udhëzimet për hartuesit e mesazheve:
-Përdorni mesazhet për të avancuar një qëllim të politikës së jashtme amerikane; mos i përdorni për të promovuar ideologji.
Fokusohuni në rezultate (p.sh. “urime Presidentit të sapozgjedhur”); mos komentoni mbi procesin (p.sh. “zgjedhjet ishin të lira dhe të ndershme”).
-Vlerësoni çdo draft sipas agjendës së politikës së jashtme të Presidentit Trump – a do ta thoshte ai këtë?
-Mos përdorni eufemizma për të anashkaluar këto udhëzime.
Leave a Reply