Avokati i ish-Presidentit Ilir Meta ka kërkuar lehtësim të masës së sigurisë dhe heqjen e “arrestit në burg”.
Në kërkesën e paraqitur nga avokatët, argumentohet se Prokuroria e Posaçme kundër Korrupsionit dhe Krimit të Organizuar ka përfunduar tashmë hetimet në ngarkim të Ilir Metës dhe për rrjedhojë, vijimi i masës së paraburgimit nuk ka më bazë procedurale.
Dy ditë më parë, SPAK i komunikoi zyrtarisht Ilir Metës mbylljen e hetimeve për dosjen e lobimit të LSI në SHBA dhe aferën CEZ-DIA dhe kalimin e dosjes në gjykatë.
Avokati i Metës, Kujtim Cakrani, në përfundim të seancës, tha se prokurorët nuk sollën asgjë të re, qoftë nga hetimi për CEZ-DIA, ashtu dhe për dosjen e lobimit në SHBA. Avokati theksoi se betejën do ta bëjnë në gjykatë me proces të zakonshëm dhe jo të shkurtuar, çka pritet të jetë një proces i gjatë gjyqësor.
Ish-Presidenti akuzohet për korrupsion, pastrim parash dhe fshehje pasurie. Ai u arrestua më 21 Tetor 2024 dhe që prej atij momenti qëndron në paraburgim me masë “arresti në burg”.
Leave a Reply