GJKKO liron nga qelia Rexhë Byberin dhe Abedin Kërrnajan, duke i caktuar masën e sigurisë “detyrim paraqitje” 1 herë në muaj.
GJKKO ka liruar nga masa e sigurisë “arrest shtëpie” kryetarin e Bashkisë Tropojë, Rexh Byberin, si dhe nënkryetarin Abedin Kërrnaja, të akuzuar për shpërdorim detyre dhe prerje e paligjshme e pyjeve.
Ndaj kryebashkiakut socialist Byberi dhe vartësit Kërrnaja, togat e zeza vendosën masën e detyrimit për paraqitje, 1 herë në muaj. Sipas avokatëve, ndaj kryetarit dhe nënkryetarit kishte mbaruar afati 6 mujor i masës së sigurisë duke marrë si referencë vendimin e Gjykatës Kushtetuese ndaj Mimoza Margjekës.
Sipas hetimeve të SPAK, në bashkëpunim me njëri-tjetrin, Byberi dhe Kërnaja kanë shkelur ligjin në miratimin e dy vendimeve në Këshillin Bashkiak për ndërtimin e rrugëve, duke i shkaktuar buxhetit të shtetit një dëm prej 277 milionë lekësh.
Bëhet fjalë për ndërtimin e rrugës “Stacioni i Anijes Palç- Guri i Lules”, totalisht ndërtim i ri i cili 80% të kësaj gjatësie kalon nëpër rrugën këmbësore ekzistuese.
Në një seancë të mëparshme, gjykata i kërkoi prokurorisë të marrin në pyetje ekspertët që kanë bërë vlerësimin e dëmeve të shkaktuara gjatë ndërtimit të një rruge nga Bashkia Tropojë. Sipas hetimeve, rruga me gjatësi 3.2 kilometra, e cila në pjesën më të madhe kalon mbi një rrugë ekzistuese këmbësore, duhej të kishte marrë lejen e ndërtimit nëpërmjet sistemit elektronik “e-leje”, duke qenë se Bashkia është autoriteti që shqyrton dhe miraton dokumentacionin ligjor dhe teknik për këtë lloj projekti.
Prokuroria gjithashtu thekson se Bashkia Tropojë ishte e detyruar të bashkëpunonte me institucionet përkatëse, si Agjencia Kombëtare e Mjedisit për hartimin e raportit të ndikimit mjedisor, si dhe me Ministrinë përgjegjëse për të vlerësuar ndikimin dhe pasojat e ndërtimit të rrugës së re.
Më 24 korrik, GJKKO nuk arriti në një vendim për kalimin në gjyq të dosjes penale në ngarkim të kryetarit të Bashkisë Tropojë, Rexh Byberi dhe zëvendësit të tij Abedin Kërrnaja. Gjyqtarja Irena Gjoka i la detyra prokurorit Elvin Gokaj që deri me datën 3 dhjetor të pyesë ekspertët që kanë hartuar aktin mbi vlerësimin e dëmit 2.7 milionë euro.
Më 4 mars, SPAK-u kishte mbyllur hetimet për rastin dhe kaloi dosjen për gjykim.
Më 12 shtator 2024, GJKKO kishte miratuar kërkesën për masën e sigurisë “arrest shtëpie” ndaj dy zyrtarëve vendorë socialistë, ndërsa sot vendosi lirimin nga arresti shtëpiak.
Leave a Reply