Situata e zjarreve në vend vijon të jetë e rëndë. Pas vënies nën kontroll të flakëve në Borsh, janë aktivizuar vatrat e zjarrit në Lukovë. Në pamjet që ka siguruar “Pamfleti” duket se i gjithë mali është nën flakë, teksa tymi ka mbuluar Himarën.
Situata është përkeqësuar edhe në fshatin Sasaj. Rreth 50 banesa të këtij fshati rrezikohen nga zjarri i madh i cili po afrohet tek banesat, policia ka evakuar banorët duke i vendosur në qendër të fshatit, pasi rreziku është pranë banesave për shkak të erës.
Ndërkohë vijon zjarri në Kalasë të Delvinës, ndërsa flakët po përhapen edhe drejt Shën Vasilit dhe Vanës Zjarrfikëset në terren për të ruajtur që të mos afrohet zjarri në shtëpitë e banuara.
Situata është katastrofike edhe në Shalës. Zjarri është rreth 500 m larg nga shtëpitë e para. Në terren janë 3 mjete zjarrfikëse.
Përmes një postimi në rrjetet sociale, ministri Pirro Vengu ka qetësuar banorët, por nga pamjet që vijnë, duket qartë se situata mbetet alarmante.
“Pas disa orëve ndërhyrje nga ajri, FA dhe MZSH kanë intensifikuar luftën me zjarrin në terren si pasojë e erërave të forta që kanë ngacmuar flakët. Fatmirësisht zjarri ndodhet larg zonava të banuara, teksa efektivët tanë do vazhdojnë angazhimin e tyre gjatë gjithë natës, nën monitorimin dhe orientimin e dronëve”, shkruan Vengu.
Leave a Reply