Pavarësisht përgjimeve, dokumenteve dhe precedentëve penalë për uljen e çmimeve të energjisë në favor të kompanive si CEZ dhe Bankers, Prokuroria dhe SPAK refuzojnë të veprojnë ndaj Petrit Ahmetit; njeriut që menaxhon energjinë dhe ndërton kulla në hije të qeverisë…
Në hetimet për korrupsion dhe vjedhjet që kanë kryer drejtuesit e kompanisë koncesionare “Bankers”, është përfshirë edhe Kryetari i Entit Rregullator të Energjisë (ERE), Petrit Ahmeti. Megjithatë, Prokuroria e Fierit nuk e ka proceduar penalisht, pavarësisht provave dhe përgjimeve të disponuara. Në dosjen hetimore, emri i Ahmetit del si bashkëpunëtor në një skemë transaksionesh fiktive me përfitim 1.4 milionë euro, përmes uljes së çmimit të energjisë për “Bankers” nga 26 në 23 lekë për kilovat.
Vendimi për këtë ulje është marrë në fillim të vitit 2022, në një kohë kur qeveria shpalli gjendjen e emergjencës energjetike, duke kërcënuar qytetarët me kufizime ekstreme në konsum. Ndërkohë, për koncesionarët e huaj, qeveria dhe ERE u ofronin energji me çmime të reduktuara dhe blinin energji me kosto të fryra, duke krijuar hapësira për korrupsion masiv. Në përgjimet e bëra për llogari të hetimeve, drejtues të “Bankers” kanë deklaruar se kjo ulje çmimi ishte rezultat i një pazari me qeverinë dhe Petrit Ahmetin, në këmbim të një shpërblimi financiar që kapte shifrën 1.4 milionë euro në një vit.
Pavarësisht këtyre fakteve, Petrit Ahmeti nuk është marrë i pandehur. Kjo nuk është hera e parë që ai përfshihet në afera të kësaj natyre. Në vitin 2022, Ahmeti u thirr në SPAK për çështjen CEZ-DIA, pasi dyshohej se kishte marrë ryshfet për të ulur çmimin e energjisë për kompaninë çeke CEZ nga 2.8 në 2.2 lekë për kilovat. Ky veprim është bërë në bashkëpunim me grupin e Ilir Metës dhe Kastriot Ismailajt, ku i fundit është dënuar me 11 vite burg. Megjithatë, Petrit Ahmeti sërish nuk u procedua penalisht.
As Prokuroria e Fierit dhe as SPAK nuk kanë guxuar të nisin hetime serioze ndaj tij, ndonëse ai është një figurë kyçe në dy skandalet më të mëdha energjetike të dekadës së fundit. Mbrojtja e tij nga ndëshkimi ngrit dyshime për ndërhyrje të nivelit të lartë dhe lidhje të tij me kupolën e pushtetit. Ndërkohë, Ahmeti vazhdon aktivitetin e tij privat si ndërtues kullash dhe menaxher tregu energjie, duke përfituar nga pozita publike dhe heshtja e drejtësisë.
Leave a Reply