Tragjedia në Shkodër dhe përgjegjësia e Bashkisë Shkodër dhe Benet Becit për Skodrinonin

Vdekja e një punonjësi bashkiak për të shpëtuar dy turistë zbardh papërgjegjshmërinë e bashkisë në administrimin e varkave të Skodrinon.

Më 8 korrik, qyteti i Shkodrës u përfshi nga tronditja e një ngjarjeje të rëndë. Arben Anamali, punonjës i Bashkisë, humbi jetën duke shpëtuar dy turistë izraelitë nga mbytja në ujërat e Liqenit të Shkodrës. Akti i tij i guximshëm dhe heroik u nderua nga qytetarët, por pas vetes la shumë pyetje pa përgjigje për përgjegjësitë institucionale.

Anija e përfshirë në këtë tragjedi ishte “Drini”, e cila rezulton të jetë pronë e Fondit Shqiptar të Zhvillimit dhe e dhënë në përdorim Bashkisë së Shkodrës. Kjo e fundit ia ka deleguar operimin ndërmarrjes “Bio Strajca”, e cila tashmë operon me emrin “Skodrinon”, një kompani publike në pronësi të bashkisë që merret me shërbime turistike dhe zhvillim ekonomik vendor.

Në prill të vitit të kaluar, kryetari Benet Beci promovoi varkat “Drini” dhe “Buna” si sukses të madh për turizmin lokal. Ai deklaroi publikisht se bashkëpunimi me Qeverinë Shqiptare dhe Fondin e Zhvillimit kishte bërë të mundur kthimin e lundrimit në liqenin më të madh në Ballkan. Por kjo propagandë e ngjyrosur nga entuziazmi u përplas me realitetin tragjik të një jete të humbur dhe dy të tjera të rrezikuara.

Pas kësaj ngjarjeje, lindin dy çështje që autoritetet nuk mund t’i shmangin më: A janë të licencuara varkat e Skodrinonit për lundrim? A kanë vend ankorimi të kolauduar?

Këto pyetje nuk janë thjesht detaje teknike, por çështje sigurie që mund të bëjnë diferencën mes jetës dhe vdekjes. Dhe përgjegjësia bie mbi Bashkinë e Shkodrës, e cila përmes Skodrinonit, duket se ka ofruar një shërbim turistik pa standarde, pa kontroll dhe pa përgatitje të duhur.

Në vend të hetimeve të thelluara, autoritetet po përpiqen të relativizojnë ngjarjen si një aksident tragjik. Por nëse mungojnë licencat, siguria dhe përgatitja e stafit, atëherë kjo nuk është më një tragjedi e rastësishme, por një krim institucional i rëndë.

Prokuroria duhet të veprojë pa vonesë. Ngjarja e 8 korrikut nuk duhet mbuluar nga heshtja, por të zbardhet në çdo detaj për të garantuar që askush tjetër të mos paguajë me jetë papërgjegjshmërinë e zyrtarëve publikë.