Mësohet se janë lëshuar masa sigurie ndaj 7 personave, përfshirë Plarent Dervishaj dhe Erjon Alibej, të cilët ndodhen në burg.
Prokuroria e Posçame, SPAK ka organizuar një aksion pasditen e sotme për goditjen e trafikut ndërkombëtar të kokainës. Aksioni i ekzekutuar nga Policia e Shtetit me urdhër të SPAK, ka çuar në arrestimin e 4 personave, dy prej të cilëve vëllezërit Artur dhe Ervin Hoxhosmani, si dhe 1 tjetër është shpallur në kërkim. Mësohet se janë lëshuar masa sigurie ndaj 7 personave, përfshirë Plarent Dervishaj dhe Erjon Alibej, të cilët ndodhen në burg.
Të arrestuarit akuzohen për trafikimin e sasive të mëdha të kokainës nga Amerika Latine në Europë. Mësohet se hetimet lidhur me këtë rast të trafikut të drogës janë zhvilluar prej 1 viti.
Kanë qenë dëshmitë e këtij të fundit, që kanë çuar SPAK në goditjen e këtij grupi kriminal, pasi Alibej ka rrëfyer për dhjetëra ngjarje si dhe për trafikun e drogës. SPAK ka në dorë dëshminë e tij dhe biseda në aplikacionin Sky Ecc.
Gjithashtu mësohet se përveç këtyre arrestimeve janë kapur ora të shtrenjta, bizhuteri dhe makina luksoze. Gjithashtu, në qelitë e burgut i janë komunikuar akuza të reja dy të burgosurve Plarent Dervishaj dhe Erion Alibej.
Kujtojmë se të dy, Dervishaj dhe Alibej, janë të përfshirë në dosjen e njohur “Plumbi i Artë”, e cila heton një seri krimesh të rënda në Elbasan dhe Durrës, përfshirë vrasje, atentate dhe trafikim armësh. Alibej, si bashkëpunëtor i drejtësisë, ka dhënë dëshmi të rëndësishme që implikojnë Dervishajn dhe figura të tjera të krimit të organizuar, duke shkaktuar tensione dhe debate të ashpra gjatë seancave gjyqësore. Një përplasje e tillë ndodhi më 4 korrik 2025, kur Dervishaj u nxorr nga salla e gjyqit pas fyerjeve ndaj Alibejt.
Ndërsa Dervishaj mbetet një nga të pandehurit kryesorë, Alibej ka përfituar nga statusi i të penduarit për të lehtësuar pozicionin e tij ligjor, duke dhënë informacione për rrjetet kriminale.
Leave a Reply