Vetëm një në pesë turistë të huaj zgjedh të akomodohet në hotele shqiptare, ndërsa tregu vendas mbetet i kapur pas platformave të vjetruara e pa strategji për rritje të qëndrueshme
Pavarësisht një fluksi në rritje të turistëve, shumica e strukturave akomoduese në Shqipëri vijojnë të funksionojnë me logjikën e viteve të kaluara, duke u mbështetur thuajse verbërisht te platforma si Booking apo TripAdvisor, ndërkohë që injorojnë fuqinë e vërtetë të marketingut modern: integrimin e website-ve me sistemet e prenotimit, optimizimin në motorë kërkimi dhe krijimin e një marke të pavarur digjitale.
Të dhënat zyrtare nga INSTAT për muajin maj 2025 janë dëshpëruese: nga 987 mijë turistë të huaj që hynë në vend, vetëm rreth 244 mijë u akomoduan në struktura të regjistruara. Pra, më pak se 25% e vizitorëve kanë fjetur në hotele, bujtina apo resorte shqiptare. Kjo është një tregues i qartë i paaftësisë së tregut për të thithur dhe menaxhuar në mënyrë profesionale prurjet turistike.
Ndërkohë që INSTAT raporton një rritje të lehtë me 31% të numrit të akomodimeve krahasuar me vitin e kaluar – falë eventeve si Giro d’Italia, samiti politik apo forumi ekonomik në Tiranë – përqindja e përdorimit të kapaciteteve hoteliere mbetet tepër e ulët. Vetëm 28% e strukturave u shfrytëzuan, shifër që tregon qartë se potenciali real ekonomik po shpërdorohet në mënyrë kronike.
Operatorët turistikë vendas mbrohen duke përmendur disa arsye: mosdeklarim i qëllimshëm i të dhënave, turistë që qëndrojnë tek të afërm ose vijnë nga rajoni pa qëllim fjetjeje, apo përdorimi masiv i strukturave të paregjistruara. Por këto nuk justifikojnë mungesën e vizionit dhe paaftësinë për të zhvilluar një strategji të qëndrueshme marketingu.
Qeveria ka vendosur pragje të detyruara për përdorimin e kapaciteteve hoteliere – 65% shfrytëzim nga 1 maji deri më 30 shtator – përndryshe ndëshkim me kontrolle tatimore. Por as ky masivizim i presionit fiskal nuk po ndryshon asgjë, pasi turistët vazhdojnë të orientohen drejt AirBNB dhe jo hoteleve që dështojnë të jenë konkurruese në një treg gjithnjë e më të zgjuar digjitalisht.
Shumica e hoteleve shqiptare kanë krijuar një varësi të rrezikshme nga platforma që nuk i ndihmojnë të ndërtojnë identitetin e tyre të markës. Ato nuk kuptojnë vlerën e krijimit të faqeve të personalizuara, përmirësimin e pozicionimit në motorët e kërkimit apo ndërtimin e besimit përmes rrjeteve sociale që shkojnë përtej një profili pasiv në Instagram. Në vend që të investojnë në ekspertizë, vijojnë të sillen si baraka dixhitale në një treg global ku lufta fitohet me inovacion dhe jo me ndërmjetës.
Në vend që të zhvillojnë struktura konkurruese që përfshijnë SEO, integrim teknologjik dhe menaxhim të të dhënave, pjesa më e madhe e hotelierëve shqiptarë vijojnë të mbështeten te shpresa dhe një llogari në Booking. Kjo është një rrugë e sigurt drejt harresës. Ndërkohë që tregu botëror e sheh turizmin si një shkencë më vete, në Shqipëri ai trajtohet ende si një sezon që kalon me ca recensione me pesë yje dhe një faqe Facebook-u pa strategji.
Leave a Reply