Në Shqipëri, deti është për t’u parë… jo për t’u shijuar. Peshku ynë më cilësor eksportohet jashtë, ndërsa në pjatat e shqiptarëve serviret peshku dhe frutat e detit të importuara nga Kina, Bangladeshi, India dhe vende të tjera, që Europa shpesh i shmang.
Prodhimi vendas, eksportohet kryesisht në vendet e Bashkimit Europian.
Televizioni “Ora News” iu drejtua e një kërkesë për informacion Drejtorisë së Përgjithshme të Doganave ku u kërkua informacion se sa prodhime deti janë importuar në Shqipëri nga viti 2020-2025 dhe për të njëjtën periudhë kohore sa është sasia e eksportit?
Sipas burimeve zyrtare na bëhet me dije se në vitin 2023 janë importuar 7,571,468 kg prodhime deti; në vitin 2024 kjo sasi është rritur me 8,681,359 kg; ndërsa vetëm në 6 mujorin e parë të vitit 2025 janë importuar 5,186,331 kg peshk dhe fruta deti.
Shteti që furnizon më së shumti Shqipërinë me prodhime deti është Kina. Vende të tjera nga të cilat importohen frutat e detit janë: India, Pakistani, Indonezia, Gambia, Namibia, Bangladeshi, Kili, Egjipti, etj
Ajo që bie në sy është fakti se prodhimet e detit vendase eksportohen në vende të ndryshme të Bashkimit Europian dhe jo vetëm.Në bazë të statistikave tre shtetet kryesore ku shkon prodhimi vendas janë: Itali, Norvegji dhe Serbi.
Në vitin 2023 janë eksportuar 5,332,852 kg prodhime deti, në 2024 janë eksportuar 4,925,856 kg dhe vetëm në 6 mujorin e pare te 2025 sasia e eksportit të prodhimit vendas ka qenë 3,595,554kg.
Në një vend ku deti është pasuri kombëtare, paradoksi është ulur në tavolinë: eksportojmë të freskëtën, por hamë të ngrirën. Ndërsa peshku shqiptar noton drejt Evropës, në pjatat tona serviren frutat e detit dhe peshku që vjen nga Kina, Pakistani dhe Bangladeshi./ Ora News
Leave a Reply