SKY NEWS AL ka verifikuar pjesërisht një denoncim të ardhur nga Mbretëria e Bashkuar, që përmend ALO PRONTO, 1001 Solutions dhe Radar Media Group si pjesë të një skeme të dyshuar mashtrimi dixhital, e lidhur me Çesk Ivanajn; përfaqësues zyrtar i kompanisë mëmë në Itali dhe ortak i oligarkut Ylli Ujka
Një rrjet i dyshuar mashtrimi që vepron nga një ndërtesë pranë Don Boskos në Tiranë po targeton konsumatorët britanikë në nevojë për ndihmë hidraulike urgjente: një tualet që ka shpërthyer, një kabllo që digjet, një dush që mbushet me ujë të ndotur. Në momentin kur viktima kërkon ndihmë në Google, gjendet përballë… ‘ALO PRONTO’, një kompani që duket vendase, por që në fakt operon qindra kilometra larg, nga Shqipëria.
SKY NEWS AL ka analizuar një denoncim të detajuar të ardhur përmes platformës sonë të komunikimit të sigurt, si dhe ka verifikuar pjesë të rëndësishme të tij përmes burimeve të hapura, regjistrave të biznesit dhe fakteve publike. Ajo që zbulohet është një skemë e strukturuar mirë, me emra konkretë, kompani të regjistruara, e me një rrjet dixhital që fshin gjurmët por jo pasojat.
Denoncimi që ndezi alarmin: “E kam parë me sytë e mi”
Një qytetar që jeton prej vitesh në Mbretërinë e Bashkuar i shkruan redaksisë sonë:
“Kam qenë dëshmitar i aktivitetit kriminal të Ylli Ujkës dhe i strukturave që drejton Çesk Ivanaj. Ato funksionojnë si agjenci marketingu apo call center, por në fakt janë kompani mashtruese që operojnë si biznese britanike. Dikur quheshin Alo Pronto. Tani janë fshehur pas emrash të rinj. Kanë funksionuar nga një kullë zyrash që drejtohej nga një mashtrues i quajtur Valentin Stojani. Kam folur me një hidraulik britanik që u ftua në këtë ndërtesë. I premtuan kokainë, femra dhe shumë punë të paguara në mënyrë të dyshimtë.”
“Ata tani vjedhin profilet e bizneseve të ndershme në Google dhe i përdorin për të marrë klientë me emergjenca. Më pas, ua shesin ‘punët’ zanatçinjve, të cilët ngarkojnë çmime të frikshme. E gjithë skema menaxhohet nga Shqipëria.
Ata kanë një rrjet hidraulikësh mashtrues përmes një rrjeti afgan të shtetasve britanikë. Personi kryesor i tyre është dikush në TikTok me emrin ‘@thatguyness’.
Tani operojnë si Radar Media Group. Në të gjitha dokumentet shfaqet emri i Çesk Ivanajt. Ai është në biznes edhe me Ylli Ujkën në sektorin e pastrimit të mbetjeve.”
”Të gjitha këto drejtohen nga i njëjti call center në Shqipëri. Më parë ndodhej në të njëjtën rrugë me qendrën gjuhësore Gloria, në zonën e Don Boskos, siç tregohet më sipër.”
ALO PRONTO SRL është një kompani e regjistruar në Shqipëri. Figura e saj ligjore është e lidhur me një kompani mëmë në Itali, ALO PRONTO S.R.L., ku përfaqësues zyrtar është Çesk Ivanaj, sipas të dhënave të regjistrit italian të kompanive.
Në Qendrën Kombëtare të Biznesit në Shqipëri, ALO PRONTO SRL ka të regjistruar si administrator një person tjetër, Berljano Sineci, por gjurmët e kompanisë lidhen qartë me aktivitet të reklamuar në Britani përmes një faqeje interneti që është vlerësuar me 0/100 nga ScamAdviser; një vlerësim i dhënë vetëm faqeve që kategorizohen si mashtruese.
Në Trustpilot dhe forume të tjera britanike, qytetarët e mashtruar nga kjo skemë raportojnë të njëjtin model mashtrimi: pagesa të fryra, mungesë faturash, zvarritje shërbimi, refuzim përgjegjësie. “Një skemë me pamje zyrtare që të vjedh pa të lënë as mundësi ankimimi,” thuhet në një koment.
1001 Solutions SHPK është një kompani e regjistruar më 1 shkurt 2024 në Shqipëri, me Erjola Jata si pronare e vetme. Në të njëjtën dosje në QKB, kjo kompani figuron si pronare e “Radar Media Group”, një emër që përkon me një kompani legjitime në Britani të Madhe që merret me teknologji në ndërtim.
SKY NEWS AL ka verifikuar që emrat “Radar Media Group” dhe “ALO PRONTO” figurojnë në të njëjtat dokumente, dhe janë të lidhura me të njëjtin rreth njerëzish që sipas denoncimit, përdorin ndërtesa në zonën e Don Boskos në Tiranë për të operuar këto skema nga call center që prezantohen si kompani marketingu.
Pjesët që ende kërkojnë hetim të thelluar
Ylli Ujka: Emri i tij nuk rezulton në ndonjë kompani të regjistruar në Britani të Madhe, nuk ka dosje publike për mashtrim dhe as ndonjë lidhje direkte në Companies House. Përmendja e tij në këtë rrjet mbetet pjesë e denoncimit, jo e dokumentuar nga autoritetet. Ujka është ortak i Cesk Ivanaj.
@thatguyness në TikTok: Një profil që promovon kurse për hidraulikë dhe premtime për fitime mbi 100 mijë paund në vit. Nuk ka prova që e lidhin direkt me rrjetin mashtrues, por sipas burimit, ai shfaqet si “fytyra e dukshme” e një ekosistemi ku ndërthuren trajnimi, marketingu dhe fitimi i shpejtë në të njëjtin sektor.
Skema e zbuluar nuk është një mashtrim i rastësishëm. Ajo ndjek modelin e “fraud at industrial scale”, një term i përdorur nga autoritetet britanike për rrjete që grumbullojnë porosi për shërbime në Google, dhe i shesin te persona që shpesh nuk kanë as licensa, as përgjegjësi ligjore.
Sipas një rasti të ndjekur nga National Trading Standards në 2020, një rrjet i tillë kishte përfituar mbi 1 milion paund, duke përdorur faqe interneti të rreme, numra telefoni lokalë, dhe premtime për “zgjidhje të shpejtë”. Klientët ishin zakonisht të moshuar, ose persona në gjendje emergjente.
Ky është modeli i ri i mashtrimit ndërkombëtar: me kompani të regjistruara, profile të manipuluara në Google, rrjete sociale që e reklamojnë, dhe shërbime që duken “profesionale”. Ajo që ndodh pas ekranit është ndryshe.
SKY NEWS AL do të vijojë hetimin e kësaj dosjeje dhe do të vërë në dispozicion të autoriteteve çdo informacion të konfirmuar. Kjo është një çështje që kalon kufijtë e Shqipërisë dhe prek integritetin ndërkombëtar të bizneseve tona.
Të gjitha të dhënat janë të bazuara në dokumente publike, deklarata të denoncuara dhe verifikime zyrtare në QKB dhe regjistrat italianë të biznesit. Pjesët e pambështetura janë të shënuara si të tilla dhe do të trajtohen me kujdesin që kërkon një investigim i hapur në vazhdim
Leave a Reply