Fatmir Xhafaj mbledh komisionin e posaçëm, ndonëse Kuvendi ka mbyllur punimet…
Edi Rama ka nxjerrë sërish në skenë Fatmir Xhafajn, duke sinjalizuar se komisioni i drejtuar prej tij do të sjellë shumë tensione dhe përplasje në legjislaturën e re parlamentare.
Pas 11 majit, deputeti socialist duket sikur u la na hije dhe kishte shumë dilema se çfarë do të ndodhte me komisionin e posaçëm të drejtuar prej tij. Por sot janë dhënë sinjalet se ai ka punuar nën rrogoz dhe në shtator do të kemi një betejë të re kundër drejtësisë dhe organeve të pavarura.
Në shkelje të hapur me ligjin, pasi Kuvendi është mbyllur, Fatmir Xhafaj ka mbledhur sot komisionin duke hedhur për konsultim një ligj të ri për konfliktin e interesit dhe një ligj mbi financimin e partive politike.
Ligji i vitit 2005 mbi konfliktin e interesit ka ndryshuar tërësisht dhe vendosen kufizime për deputetët, ministrat, gjyqtarët, prokurorët, presidentin, kreun e KLSH dhe krerët e organeve të tjera kushtetuese.
“Ky projekt ligj i rëndësishëm, përkon edhe me një rekomandim të BE, është ligj prioritar që duhet të kalojë shteti shqiptar. Asistohemi nga Këshilli i Evropës”, tha Xhafaj.
Pra duket se preteksti i integrimit në BE, do të sjellë një sërë ligjesh të reja në shtator, përfshirë rishikimin edhe të ligjeve të drejtësisë, duke bërë që Xhafaj të shënjestrojë kë t’i dojë qejfi.
Lidhur me këtë mbledhje reagoi deputetja demokrate Jorida Tabaku. Sipas saj, kjo mbledhje bëhet në kundërshtim me kushtetutën pasi sesioni parlamentar ka përfunduar, ndërsa thotë se është dëshmi e kapjes nga shumica të këtij komisioni.
“Megjithëse sesioni parlamentar ka përfunduar dhe komisionet e përhershme nuk zhvillojnë më aktivitet, shumica ka zgjedhur t’i hapë dyert antikushtetutshmërisë dhe antiligjshmërisë. Në mënyrë të paprecedent, është thirrur një dëgjesë për dy nisma që prej vitesh mbahen peng nga kjo shumicë: ligji për konfliktin e interesit dhe ai për partitë politike. Dhe kush tjetër përveç Komisionit të mirënjohur të z. Xhafaj do ta merrte përsipër këtë shkelje? Thirrja e kësaj mbledhjeje vjen në një kohë pushimi institucional, në kundërshtim të plotë me Kushtetutën dhe ligjin. Shqipëria sot nuk ka një emergjencë ligjore që justifikon thirrjen e komisioneve. Përkundrazi, shumica nuk arriti të sigurojë as 71 votat për miratimin e ligjeve. Por për të mbajtur monopolin politik mbi proceset e integrimit dhe reformave, gjen rrugë të njëanshme dhe procedura jashtë normës demokratike”, shkruan Tabaku.
Sipas saj, komisioni Xhafaj ka funksionuar që në fillesë si një mjet i kapjes së procesit nga shumica; ka shkatërruar çdo parim të bashkëpunimit politik, duke përjashtuar opozitën dhe duke kthyer reformat e integrimit në pronë partiake.
Leave a Reply