Trajneri Edi Martini foli në Letoni, pasi Vllaznia siguroi kualifikimin ndaj Daugavpils. Tekniku i kuqebluve iu gëzua fitores 2-4 jashtë vendit, për të kaluar në turin e dytë të Ligës së Konferencës, ku do të përballet me Vikingur Rejkjavik të Islandës.
Në fjalët e Martinit kishte edhe fjalë të bujshme ku drejtohej me thumbime.
“Shumë e rëndësishme, dua të falenderoj djemtë pafund. Shënuan, pësuan, kaluan në disavantazh, arritën të kthejnë rezultatin. Komplimente djemve, komplet meritë e tyre, bravo u qoftë.
Do të thotë shumë, me gjithë këto peripeci që kaluam, dëmtime dhe largime, stadiumi, arritëm të bëjmë një ndeshje, luajtëm mirë, pavarësisht që t u shpërqendruam dhe pësuam dy gola. Nuk dua të ndalem te gabimet. Dua të ndalem te karakteri që djemtë treguan në fushë, nuk u demoralizuan, luftuan dhe bravo u qoftë.
Patëm besim. Në momentet që pësuam 1-2, aty kishte momente paniku. Në pjesën e dytë qetësuam djemtë, u thamë që është 0-0 ndeshja, vazhdoni lojën, ne duhet të bëjmë lojën tonë. E arritëm, drithërima, ethe, siklet, emocione pafund, jam i kënaqur.
Këtu jemi 23 lojtarë, nuk ka të rinj dhe të vjetër. Ata që do paraqiten më mirë, që do japin më shumë, do fitojnë besimin, do të luajnë, nuk ka rëndësi i ri apo i vjetër. Ai që jep në stërvitje, djersa e gjithsecilit shërbehet.
Kam dy netë pa gjumë, shyqyr zotit sot kam me fjet pak. Në radhë të parë dua t’ja dedikoj prindërve të mi se e shohin, nuses dhe vajzës time dhe gjithë djemve të ekipit.
Diego Martini? E kisha gjithë mendjen tek ai se e di që e vuan si unë. Ishte ndeshje që na kënaqi të gjithëve, falimenderit për interesimin.
Ne kemi kryer një detyrë që ishte për t’u kryer. Një eliminim karshi këtij kundërshtari, unë personalisht do ta quaja turp. Kur të rreh një ekip më i mirë se ti, normalisht i jep dorën, por të luash dy ndeshje, të dominosh dhe të kualifikohen këto ishte… shyqyr zotit e kthyem.
Ndeshja e turit të dytë është pas një jave, nuk kemi kohë për asgjë. Duhet të mundohemi të japim maksimumin, ndeshja vjen, kemi situata me dëmtimet, lodhja ka bërë punën e vet. Do mundohemi që gjatë kësaj jave të kemi ndonjë përforcim që mund të na ndihmojë, shpresojmë të na vijnë 2-3 lojtarë që i presim. Dhe nuk do shkojmë për turizëm.
Të gjitha repartet do të përforcohen. Do bëjmë çfarë është e munduar ta bëjmë ekipin gati. Kam qenë futbollist në Champions, kur kemi luajtur kundër tyre, jemi kualifikuar. Ndoshta e vështirë, por nuk shkojmë për turizëm.
Unë i përshëndes dhe falenderoj të gjithë tifozët që na kanë mbështetur. I them atyre që nxjerrin helm nga goja, helmin që keni nxjerr mbajeni për vete sepse ju infekton juve. Ne nuk na bën asgjë. Ne vazhdojmë të ecim përpara, jemi familje. Sa më tepër pozitivitet edhe atyre që nuk flejnë rehat, kur fitojmë ne.
Ne kemi kryer një detyrë, do japim maksimumin, e dimë që do kemi kundërshtar të fortë që është i mirë fizikisht. E patë çfarë i bëri Egnatias në ndeshjen e dytë. Gjithsesi, kemi kohë të përgatitemi 4-5 ditë, dhe të luajmë lojën tonë.
Fjala kampion është fjalë e madhe. E dëshirojmë i madh dhe i vogël, ka edhe ata që nuk dëshirojnë me thënë të drejtën. Duhet të shohim, derisa të fillojë kampionati duhet të bëjmë përmirësime në ekip, të blejmë lojtarë, të marrim ata që na nevojiten. Duke parë blerjet që do të bëjmë, do dalim tek ajo që është ëndrra ime dhe dëshira e të gjithëve me dal kampion. Do luftojmë për të. Megjithatë, derisa ta kompletojmë skuadrën dhe të shohim çfarë bëjnë të tjerët se po investohet shumë, pastaj do flasim për titull. E kam ëndërr në maksimum.
Kevit i uroj gjithë të mirat e botës, është djalë me karakter. Nuk është e thjesht që në një ndeshje që mund të vrasësh këmbën, të dëmtohesh, ai luajti deri në sekondat e fundit me insistim, na dha golin dhe asistin, i them rrugë të mbarë, djalë me karakter dhe bravo i qoftë”, u shpreh Martini pas kualifikimit.
Leave a Reply