Si diploma “Jurist” e Arben Kingjit, e marrë në një universitet të mbyllur për shitje diplomash, ngre dyshime për integritetin e tij dhe të institucioneve ushtarake në Shqipëri…
Te dosja që i dorëzoi NATO-s, si kandidat për detyrën e Shefit të Shabit të Përgjithshëm Ushtrisë, Arben Kingji, deklaroi se në vitn 2016 ka pëfunduar edhe studimet për “Drejtësi” te kolegji universitar “WISDOM” në Tiranë, ndërsa në muajin tetor 2024, pas mbylljes së këtij universiteti dhe hetimit për shitje diplomash, ai e hoqi nga CV…
Më 11 gusht 2025, Arben Kingji u ri-emërua për mandatin e dytë në detyrën e Shefit të Shtabit të Përgjithshëm të Ushtrisë, megjithëse gjatë mandatit të parë u përfshi në disa skandale ekonomike-financiare dhe shpërdorim detyre, lidhur me emërime e gradime të paligjshme dhe krijimin e një rrjeti nepotik e klanor në kupolën e ushtrisë. Përveç këtyre aferave, një informacion i ardhur në “Pamfleti” zbulon skandalin e radhës të krye-ushtarakut Arben Kingji, këtë herë për përfitim diplome të dyshimtë, në një universitet privat që qeveria e mbylli më 25 shtator 2024 për shitje diplomash.
Bëhet fjalë për diplomën “Jurist”, që Shefi i Shtabit të Ushtrisë Shqiptare, Gjeneral Leitnant Arben Kingji, ka marrë në vitin 2016 te ish-Kolegji Universitar “WISDOM” në Tiranë, si diplomë të dytë pas diplomës për ushtarak në vitin 1993. Sipas logjikës së rregullit universitar, ai ka kryer studimet e rregullta në sistemin Bachelor te Fakulteti Juridik i Universitetit “WISDOM” për degën “Jurist”, kur gjatë periudhës 3-vjeçare 2013-2016, ka qenë funksionar i lartë ushtarak me kohë të plotë, ndërsa disa periudha kohore ka qenë për trajnime, stërvitje dhe misione jashtë vendit.
Skandali i diplomës “Jurist” të kreut të Ushtrisë Shqiptare, Arben Kingji, u zbulua gjatë procesit të hetimit që Prokuroria e Tiranës ka bërë në lidhje me Procedimin Penal Nr. 4148/2024 për shitjen e diplomave false nga universiteti privat “WISDOM” për 10 mijë Euro, të cilat i regjistronte sikur të diplomarit kishin kryer studimet dhe kishin dhënë provimet rregullisht. Nga hetimi, rezultoi se edhe emri i studentit Arben Voke Kingji, vendlindja Kukës dhe vendbanimi Tiranë, figuron në regjistrin e universitetit “WISDOM”, por pa dosje personale provimesh, ndërsa në listën e të diplomuarve të vitit 2016, që universiteti privat i ka dërguar Ministrisë së Arsimit për certifikim e njohje, emri i tij nuk figuron.
Nisur prej dyshimeve të arsyeshme, bazuar në prova dhe mangësive e mos përputhjeve në dokumenta për diplomën “Jurist” të Shefit të Shtabit të Ushtrisë dhe për shumë persona të tjerë, Prokuroria e Tiranës ka pyetur ish-rektorë, dekanë dhe shefa të katedrës të Fakultetit Juridik te ish-universiteti “WISDOM”, të cilët kanë shprehur habi që Gjeneral Kingji të ketë qenë student atje.
Tashmë, ky rast duhet të jetë objekt hetimi nga SPAK, dhe urojmë që Shefi i Shtabit të Përgjithshëm të Ushtrisë, Gjeneral Leitnant Arben Kingji, të dalë “i pastër”, por dokumentet dhe periudha kohore flasin për marrje diplome fiktive. Saktësojmë, se në dosjen që Arben Kingji i dorëzoi NATO-s në muajin korrik 2022, pasi Kryeministri Edi Rama e propozoi për mandatin e parë në detyrën e Shefit të Shtabit të Përgjithshëm të Ushtrisë, Arben Kingji deklaroi se në vitin 2016 ka përfunduar edhe studimet për “Drejtësi” te kolegji universitar “WISDOM” në Tiranë. Ndërsa në muajin tetor 2024, pas mbylljes së këtij universiteti dhe nisjes së hetimit për shitje diplomash false, ai e hoqi nga CV-ja diplomimin si jurist; ndoshta ka hequr dhe kartonin e diplomës nga dosja personale si Shef i Shtabit të Përgjithshëm të Ushtrisë.
Leave a Reply