Një 34-vjeçar shqiptar është arrestuar nga policia në Itali, pasi u kap në flagrancë me një sasi të madhe droge dhe një armë zjarri në banesën e tij në zonën e San Lazzaro di Savena në Bolonja.
Në total, policia gjeti 11.4 kilogramë kokainë të ndarë në 10 pako dhe një revole të llojit Arminius, kalibri 38 Special, e cila ishte fshehur brenda një furre.
Gjatë kontrollit, agjentët zbuluan gjithashtu një plumb të futur në armë dhe një çorape që përmbante 23 plumba të tjerë të të njëjtit kalibër. Hetimet zbuluan se revolja ishte vjedhur në një banesë në provincën e Sienës në nëntor të vitit 2022.
I arrestuari është një emër i njohur për drejtësinë italiane. Ai rezulton i dënuar me 14 vite burg për një vrasje të ndodhur në Bolonja më 26 shtator 2011 dhe kishte qenë i përfshirë gjithashtu në hetime për shfrytëzim prostitucioni. Pasi përfundoi dënimin në maj të vitit të kaluar, ai ra sërish në syrin e hetuesve për dyshime mbi përfshirje në trafikun e drogës.
Operacioni i fundit i policisë vjen pas një periudhe vëzhgimi të lëvizjeve të tij dhe konfirmon rrezikshmërinë e individëve me precedentë të mëparshëm penalë. Arrestimi i tij konsiderohet si një goditje e rëndësishme ndaj rrjeteve të trafikut të drogës në zonë.
Policia italiane ka bërë të ditur se hetimet po vazhdojnë për të zbuluar lidhje të tjera të mundshme dhe rrjetin e personave të përfshirë në trafikimin e lëndës narkotike dhe armës së sekuestruar
Leave a Reply