Nga apartamenti i paguar me para mafie te licencimi i udhëtimeve për rrjetin kriminal: historia e errët e Ilir Prodës dhe Ylli Carës zbulohet në detaje nga raporti i vettingut dhe dokumentet zyrtare…
Hetimi i Komisionit të Vettingut Policor ka zbuluar lidhje të drejtpërdrejta financiare dhe kriminale mes Drejtorit të Përgjithshëm të Policisë së Shtetit, Ilir Proda, dhe një prej personazheve më të rrezikshëm të botës së krimit, Ylli Cara. Sipas raportit, Proda ka qenë ortak 50% në kompaninë “Sara & Kristi Sh.p.k”, me objekt dhënien me qira të makinave, ndërsa Cara i ka paguar personalisht blerjen e një apartamenti në Tiranë me vlerë 70 milionë lekë.
Lidhja e tyre, sipas të dhënave, daton që në tetor të vitit 2013 dhe është konkretizuar edhe në një tjetër kompani, “Star_Tours 2014 Sh.p.k”, që fillimisht u regjistrua si “Ezel Albania” më 24 tetor 2013, vetëm 4 ditë pasi Ilir Proda u emërua Shef i Komisariatit Nr. 2 në Tiranë.
Ortaku i Ylli Carës në këtë kompani ishte shtetasi turk Hasan Abbas Kaplan, i cili ka pasur probleme penale në Turqi dhe ka pritur disa herë Ilir Prodan gjatë udhëtimeve të tij atje. Kompania kishte një profil aktiviteti të gjerë, përfshirë tregti me shumicë e pakicë, pasuri të paluajtshme, mjete transporti, pajisje mjekësore, flori dhe argjend, si dhe dhënie makinash me qira.
Vetëm tre muaj pas regjistrimit, kjo kompani u përfshi në aktivitete kriminale, përfshirë trafik droge, kontrabandë floriri dhe transfertë të paligjshme parash nëpërmjet rrjeteve shqiptaro-turke me bazë në Stamboll dhe Ankara. Në këtë periudhë, SHISH, njësitë kundër krimit dhe antitrafikut e kishin skeduar kompaninë dhe kishin identifikuar Ilir Prodan si informator dhe mbështetës të Carës.
Pasi u informua nga Proda për hetimet ndaj tij, turku Hasan Kaplan u tërhoq nga ortakëria më 14 janar 2014, duke ia shitur për vetëm 49 mijë lekë pjesën e tij Carës. Vetëm dy javë më pas, më 28 janar 2014, kompania ndryshoi emrin në “Star_Tours 2014”, por vijoi aktivitetin e paligjshëm.
Për shkak të këtyre provave, Ilir Proda u transferua nga Tirana në Bulqizë. Por lidhja me Carën vijoi, me këtë të fundit që shfrytëzonte terrenin për të kontrolluar veprimtarinë ilegale në minierat e kromit, përmes dhunës dhe zhvatjes.
Gjatë viteve 2017–2023, kur Proda shërbeu si drejtues i seksioneve më të rëndësishme në Policinë e Shtetit dhe si drejtues në policitë e Elbasanit e Korçës, Ylli Cara kishte terren të lirë për të trafikuar njerëz dhe para, duke kaluar në kufi persona të kërkuar me dokumente false.
Më 28 janar 2024, Ylli Cara pajiset me licencën e tipit “VII.1”, duke legalizuar formalisht aktivitetin e transportit të udhëtarëve brenda dhe jashtë vendit, përfshirë udhëtime turistike, bileta, rezervime hoteli, e të tjera. Aktivitet që më parë e kryente pa leje me 11 mjete, të cilat rinovoheshin çdo 6 muaj përmes lejeve të dhëna nga Drejtoria e Transporteve Rrugore, nën drejtimin e Blendi Gonxhes.
Leave a Reply