Një ngjarje e rëndë me pasoja tragjike ndodhi dje në autostradën Tiranë–Durrës, ku një aksident automobilistik i shkaktuar nga pakujdesia dhe mungesa e përvojës ka marrë jetën e një 18-vjeçari.
Në pranga ka rënë shtetasi D.D., vetëm 19 vjeç, i cili dyshohet se humbi kontrollin e automjetit që drejtonte, duke dalë nga rruga dhe duke shkaktuar një përplasje të rëndë.
Sipas njoftimit zyrtar të Policisë së Shtetit, viktima është shtetasi E.B., 18 vjeç, banues në Durrës, i cili ndodhej në sediljen e pasagjerit. Po ashtu është lënduar rëndë një tjetër pasagjer, E.Sh., 19 vjeç, si dhe vetë drejtuesi i mjetit, të cilët aktualisht po marrin ndihmë mjekësore në spital.
Ngjarja ka ndodhur më 12 korrik, ndërsa arrestimi i të riut është bërë këtë të dielë, më 13 korrik. Materialet janë referuar në Prokurorinë për veprime të mëtejshme, ndërsa policia po vijon hetimet për të përcaktuar rrethanat e plota të aksidentit.
Një tjetër dramë në rrugët shqiptare, që vë në pikëpyetje sigurinë rrugore dhe papërgjegjshmërinë në timon.
“Specialistët e Qarkullimit Rrugor arrestuan shtetasin D. D., 19 vjeç, pasi ditën e djeshme, në autostradën “Tiranë–Durrës”, dyshohet se ka humbur kontrollin mbi drejtimin e automjetit dhe për pasojë automjeti ka dalë nga rruga. Nga aksidenti ka humbur jetën pasagjeri, shtetasi E. B., 18 vjeç, banues në Durrës, si dhe janë dëmtuar drejtuesi i automjetit dhe pasagjeri tjetër, shtetasi E. Sh., 19 vjeç, të cilët ndodhen në spital, nën kujdesin e mjekëve”, njofton policia.
Leave a Reply