Një qytetari të zakonshëm i shkon te dera policia sepse ndërron dritaret apo pllakat e tualetit, si ka mundësi nuk e morën vesh që po masakrohej Thethi…
Pas 12 vitesh qeverisje, kryeministri Edi Rama, duket se është kujtuar se problemi më madhor me të cilin përballen qytetarët përditë, janë hapësirat publike. Lokale, dyqane, kioska, etj., kanë zaptuar trotuaret dhe hapësirat e gjelbra prej vitesh të tëra dhe kjo është bërë në bashkëpunim me inspektorët bashkiakë, policinë e shtetit dhe këdo tjetër që është përgjegjës.
Ne të “Sky News AL” kemi denoncuar shumë raste se si hapësirat publike janë shndërruar në parkime private dhe kjo është bërë në bashkëpunim me shtetin. Duket se kryeministri tani u kujtua. Të shpresojmë që ky aksion të vijojë pa ndalim, pasi mund të përfundojë si aksioni që nisi për katet pa leje.
Një nga debatet që hapi sot Rama është bentonizimi i Thethit. Në fakt kemi të bëjmë me një rast skandaloz. Në një prej perlave të Shqipërisë, janë ndërtuar mbi 10 kabina, teksa janë prerë pemë dhe është shkatërruar gjelbërimi. Rama sot akuzoi prokuroren e zonës, e cila sipas tij, nuk filloi procedim.
“Si ka mundësi, si është e mundur që pasi, inspektorati përkatës dhe policia konstatojnë një ndërhyrje të tillë mu në zemër të asaj mrekullie të maleve shqiptare, dhe përcjellin rastin në prokurori, prokuroria nuk shpall në kërkim të menjëhershëm personin, por vendos mosfillimin e çështjes. Duke qenë se kërkova të kuptoj më shumë, u ndesha me një vendim të një prokuroreje, zonja Gjeli, që më la pa fjalë. E ndava vendimin me disa të tjerë për të kuptuar se çfarë nuk arrija dot të kuptoja, por edhe reagimi i të tjerëve ishte pa fjalë. Dhe po ju lexoj se si arsyeton zonja Gjeli, prokurore nga trupa e shumë mirëpaguar me taksat e shqiptarëve, e cila presupozohet se duhet t’i mbrojë pasuritë e përbashkëta të këtij populli, thesaret e këtij vendi, nga individë si ai që ka plagosur Thethin, në cenim total të çdo lloj norme të bashkëjetesës në këtë vend dhe shkelje flagrante të një sërë ligjesh pasi është zonë e mbrojtur”, u shpreh kryeministri.
Në media kanë dalë fotot e të ashtuquajturit “fshat turistik”. Duket qartë se si është masakruar një prej zonave më të bukura aty. Pyetja që shtrohet natyrshëm është: ku ishte Rama, ku ishin inspektorët, ku ishin policia në momentin që nisi ndërtimi?
Aty është punuar me fadroma, me matrapikë, me trapanë dhe pajisje të tjera që i kanë parë të gjithë. Shumë mirë kryeministri që u kujtua dhe IKMT e prishi sot, por të tilla masakra duhet të parandalohen dhe fajin kryeministri duhet ta shohë fillimisht te të vetët. Dikush e ka mbushur xhepin dhe ka mbyllur sytë për këtë masakër. /SKY NEWS AL
Leave a Reply