SPAK ka përfunduar hetimet dhe ka çuar për gjykim avokatin Bardhi Koçi, i akuzuar për tre episode të veprës penale “Ushtrim i ndikimit të paligjshëm ndaj personave që ushtrojnë funksione publike”, parashikuar nga neni 245/1, paragrafi 4 i Kodit Penal.
Në të njëjtën dosje është përfshirë edhe klientja e tij, Pranvera Meshi, e akuzuar për të njëjtën vepër, parashikuar nga paragrafi 2 i të njëjtit nen.
Hetimet nisën pas një çështjeje ndaj Pranvera Meshit, e cila po gjykohej në Tiranë për “Falsifikim të dokumenteve shëndetësore”.
Sipas SPAK, Koçi, që në atë kohë ishte edhe punonjës në Kontrollin e Lartë të Shtetit, i ka kërkuar Meshi-t 1500 euro dhe ka përfituar paraprakisht 1000 euro, me premtimin se do të ndikonte tek gjyqtari i çështjes së saj.
Nga bisedat telefonike të përgjuara, SPAK thotë se Koçi ka kërkuar para me qëllim ndikimi në vendimmarrje, ndërkohë që nuk provohet që ai të ketë komunikuar realisht me ndonjë funksionar drejtësie.
Pavarësisht kësaj, prokuroria thotë se vepra penale është konsumuar me vetë kërkesën dhe përfitimin e shumës prej 1000 euro.
Koçi ka mohuar akuzat gjatë seancave për masën e sigurisë. “Kontrolli i banesës ishte pa vendim gjykate dhe nuk u gjet asnjë send komprometues. Duhet të provohet kush është gjyqtari apo prokurori që është korruptuar me 1000 euro”, është shprehur ai në gjykatë.
Gjithashtu, sipas akuzës, Koçi i ka kërkuar një tjetër personi, A.M., shumën prej 1300 euro për të ndikuar tek funksionarë të sistemit të drejtësisë me qëllim përshpejtimin e seancës për caktimin e masës së sigurisë ndaj shtetases N.M., e arrestuar për drejtim të parregullt të mjetit.
Ndërsa SPAK e akuzon Bardhi Koçin edhe për një tjetër episod ku sipas dosjes thuhet se avokati ka marrë përfitime të parregullta nga shtetasi, R.G., me qëllim ushtrimin e ndikimit tek ekspertët e Institutit të Policisë Shkencore.
Për avokatin Koçi, Gjykata e Lartë ndryshoi së fundmi masën e sigurisë nga arrest shtëpie në detyrim paraqitjeje, duke pranuar rekursin e tij dhe liruar atë pas disa muajsh në arrest shtëpiak.
Njoftimi i plotë i SPAK
“Prokuroria e Posaçme kundër Korrupsionit dhe Krimit të Organizuar, pas përfundimit të hetimeve, dërgoi gjykim më 05.08.2025, procedimin penal, nr.229/1 viti 2021 në ngarkim të të pandehurve:
1.Bardhi Koçi, i akuzuar për veprën penale, “Ushtrimi i ndikimit të paligjshëm ndaj personave që ushtrojnë funksione publike”, (tre episode) parashikuar nga neni 245/1 paragrafi 4 i Kodit Penal.
2.Pranvera Meshi, e akuzuar për veprën penale, “Ushtrimi i ndikimit të paligjshëm ndaj personave që ushtrojnë funksione publike, parashikuar nga neni 245/1 paragrafi 2 i Kodit Penal.
Prokuroria e Posaçme Kundër Korrupsionit dhe Krimit të Organizuar, me datë 27.08.2021, mbi bazën e akteve të dërguara nga Policia Gjyqësore ka regjistruar procedimin penal nr.229, për veprat penale, “Ushtrim i ndikimit te paligjshëm ndaj personave që ushtrojnë funksione publike” dhe “Shpërdorim të detyrës”, të parashikuara nga nenet 245/1 dhe 248 të Kodit Penal.
Në vijim të hetimeve për këtë procedim penal, përmes aplikimit të metodave speciale të hetimit është dokumentuar kryerja e veprës penale, “Ushtrim i ndikimit të paligjshëm ndaj personave që ushtrojnë funksione publike”, parashikuar nga neni 245/1 paragrafi 2 dhe 4 i Kodit Penal, e kryer nga shtetasit, Pranvera Meshi dhe Bardhi Koçi.
Shtetasja Pranvera Meshi, në kohën e kryerjes së veprës penale po gjykohej në Gjykatën e Shkallës së Parë të Juridiksionit të Përgjithshëm Tiranë, e akuzuar për veprën penale “Falsifikim i dokumenteve shëndetësore”, parashikuar nga neni 188/1 i Kodit Penal.
Shtetasi, Bardhi Koçi, me profesion avokat (i cili në kohën e kryerjes së veprave penale ishte i punësuar me detyrë Auditues në Kontrollin e Lartë të Shtetit) ka kërkuar nga shtetësja Pranvera Meshi, shumën prej 1500 (një mijë e pesëqind) euro dhe ka marrë prej saj në formën e përfitimit të parregullt, shumën paraprake prej 1000 (një mijë) eurosh, me qëllim ushtrimin e ndikimit në vendimarrjen e gjyqtarit, i cili po shqyrtonte çështjen në ngarkim të saj.
Shtetasi, Bardhi Koçi, ka kërkuar nga shtetasi A.M., shumën prej 1300 (një mijë e treqind) eurosh, me qëllim ushtrimin e ndikimit tek dy funksionarë të sistemit të drejtësisë, me qëllim përshpejtimin e seancës gjyqësore për caktimin e masës së sigurimit personal ndaj shtetases N.M., e arrestuar për veprën penale, “Drejtimi i automjeteve në mënyrë të parregullt”, e parashikuar nga neni 291 i Kodit Penal.
Gjithashtu shtetasi Bardhi Koçi ka marrë përfitime të parregullta nga shtetasi, R.G., me qëllim ushtrimin e ndikimit tek ekspertët e Institutit të Policisë Shkencore. Ky ndikim kishte të bënte me nxjerrjen e aktit të ekspertimit kimik për një sasi lënde narkotike, e cila i ishte sekuestruar shtetasit B.G, i dyshuar për veprën penale, “Drejtimi i automjeteve në mënyrë të parregullt”, e parashikuar nga neni 291 i Kodit Penal.
Prokuroria e Posaçme kundër Korrupsionit dhe Krimit të Organizuar ka dokumentuar dy episode të tjera të kryerjes së veprës penale,“Ushtrimi i ndikimit të paligjshëm ndaj personave që ushtrojnë funksione publike”, parashikuar nga neni 245/1 paragrafi 4 i Kodit Penal, nga shtetasi Bardhi Koçi dhe po vijon hetimet për dokumentimin e rrethanave dhe fakteve të tjera që kanë dalë nga hetimet e kryera lidhur me këtë procedim penal.
Sqarim: Çdo person prezumohet i pafajshëm derisa nuk vërtetohet fajësia e tij me vendim gjyqësor të formës së prerë”, thuhet në njoftim.
Leave a Reply