Kreu i PD, Sali Berisha para ambienteve të SPAK, foli për vendimin e Strasburgut për 21 janarin, ku 4 protestues u vranë me armë gjatë një proteste të opozitës së asaj kohe, teksa vetëm pak ditë më parë kreu i SPAK Altin Dumani deklaroi se dosja është çështje prioritare për Prokurorinë e Posaçme.
Kreu i demokratëve u shpreh se edhe ai e ka cilësuar 21 janarin një krim shtetëror, por pa dashje, teksa shtoi se qeveria amerikane ka kërkuar që të hetohen dhe organizatorët e kësaj proteste.
“E kam quajtur unë përpara. Pse? Se unë nuk mund të them që ata nuk u vranë nga njerëz të shtetit. Por krimi shtetëror është krim shtetëror me dashje dhe krim shtetëror pa dashje. Ka klasifikim krimi shtetëror. Krimi shtetëror me dashje ka rregullat e veta kur quhet, kur shteti e merr të pafajshëm dhe e pushkaton. Kur shteti jep urdhër këtë, kur s’duhet ta bëjë kurrë atë.
Krim shtetëror pa dashje është kur ndodh nga rikosheta, ndodh nga detyra, sepse garda ka patur një ligj. Unë e kam thënë 5-6 vjet para, që është krim shtetëror, krim shtetëror pa dashje. Në rastin e krimit shtetëror, dëmshpërblimi nga shteti i viktimës është më i madh. Këta, siç di unë, janë dëmshpërblyer me shuma, nuk di të them afrohen në shkallën e duhur apo jo.
Ata u vranë nga armët e shtetit, por nuk ishte qëllim vrasja. Dhe është faktuar kjo që them. Nuk ka patur absolutisht asnjë urdhër. Aq sa është përgjegjës Edi Rama direkt që i solli aty. Ka një deklaratë të qeverisë amerikane aty, që thotë të hetohet nga polici, tek organizatori. Ka një deklaratë tjetër, që demonstrata ishte e dhunshme dhe kishte axhendë politike. Edi Rama është përgjegjësi kryesor”, tha Berisha.
Leave a Reply