Kodi i Ri Penal propozon lirimi me kusht për të dënuarit me burg përjetë.
Ministri i Drejtësisë, Ulsi Manja, ka prezantuar këtë të premte draftin e ri të Kodit Penal, për të cilin u shpreh se puna ka nisur që në vitin 2019 nga një grup ekspertësh të pavarur, të kryesuar nga drejtori i Shkollës së Magjistraturës, Arben Rakipi.
Gjatë fjalës së tij në prezantim, Arben Rakipi tha se një klauzolë e këtij drafti është edhe lirimi para kohe me kusht për të dënuarit me burgim të përjetshëm.
Ky propozim tejet i diskutueshëm dhe që pritet të shkaktojë polemika, për Rakipin është një masë që në praktikë mund të hapë derën për daljen nga burgu të disa prej kriminelëve më të rrezikshëm.
“Njerëzit ndryshojnë,” tha Rakipi, duke argumentuar se procesi i riedukimit dhe përmirësimi personal janë të mundshëm, madje të zakontë, gjatë qëndrimit në burg.
Ai shtoi se një praktikë e tillë aplikohet edhe në vende të tjera perëndimore, ndërsa e cilësoi vetë propozimin si “të guximshëm” dhe pranoi se debatet mbi këtë çështje kanë qenë të forta.
Ky propozim sipas Rakipit, aplikohet edhe në shtete të tjera perëndimore.
“Dua të ndalem te lirimi para kohe me kusht. Ne kemi patur në ligj disa pengesa që lidhen me aplikimin e lirimit para kohe me kusht, lidhur me burgimin e përjetshëm. Diskutimi i gjatë u mbyll me propozimin që po, ne mund ta aplikojmë lirimin para kohe me kusht, për dënimin me burgim të përjetshëm. Duhet të më besoni, është një propozim shumë i guximshëm. Debati ka qenë i fortë. Këtu pleksen shumë gjëra, viktima, procesi i riedukimit, paqja sociale, shkalla e kriminalitetit në vend.
Nisur nga besimi, që edhe personalisht kam, që njerëzit ndryshojnë, njerëzit përmirësohen nga kushtet në të cilat vendosen dhe nëse puna me ta është e efektshme. Kjo nuk është një parrullë e thënë për shkak të formimit tim, por është një eksperiencë e përditshme që ndodh gjithandej. Prandaj edhe ne e propozuam këtë zgjidhje. Se çfarë fati do të ketë kjo zgjidhje…”, tha mes të tjerash Rakipi.
Ky qëndrim ka ngritur pikëpyetje serioze mbi sigurinë publike dhe drejtësinë për viktimat, në një kohë kur vendi përballet me shqetësime të vazhdueshme për rritjen e kriminalitetit.
Qartazi ky propozim skandaloz është një tentativë për të zbutur ndëshkimin për krime të rënda në vend.
Leave a Reply